Zhvillohet Forumi Mesdhetar i ALF 2013

Ermal BEGA

ZHVILLOHET FORUMI MESDHETAR I ALF 2013

Në Marsejë të Francës, nga data 4-7 prill 2013, në Pallatin Pharo (Pharo Palace), u zhvillua Forumi Mesdhetar 2013 i organizuar nga fondacioni Anna Lindh (ALF), një organizatë elitë në përgatitjen e aktiviteteve të shoqërisë civile sot, në tërë Euro-Mesdheun.

Logo e Forumit Mesdhetar të Fondacionit Anna Lindh (ALF), Marsejë 2013.

Gjatë këtyre ditëve, mbi 1500 përfaqësues të organizatave të ndryshme të shoqërisë civile, nga 43 shtete të Euro-Mesdheut, u mblodhën për të diskutuar në shumë fusha të ndryshme në dobi të shoqërisë civile sot. Personalitete të ndryshën morën pjesë gjithashtu në këtë veprimtari aktive. Gjatë 4 ditëve, aty u diskutuan dhe u bënë debate për çështje të ndryshme si dhe u paraqitën projekte të ndryshme.

Foto e përbashkët me presidentin e Fondacionit Anna Lindh, André Azoulay

Jo më kot ky forum u zhvillua këtë vit në Marsejë, por arsyeja kryesore ishte se Marseja është konsideruar si qyteti europian i kulturës për vitin 2013, prandaj shumë aktivitete të ndryshme janë planifikuar të organizohen këtë vit në këtë qytet, dhe ky forum u bë pjesë e këtyre aktiviteteve.

Me moton “Qytetarët për Mesdheun” (Citizens for the Mediterranean), ky forum hapi një hapësirë për bashkëveprime, shkëmbime dhe debate për çështje kryesore me të cilat përballet Euro-Mesdheu sot, me plane konkrete për një bashkëpunim më të mirë përmes rajonit. Në mesin e konkluzioneve kryesore, partnerët e ndryshëm propozuan zhvillimin e Javës Vjetore të Mesdheut, ku të ndahen zërat dhe veprimet e përbashkëta të qytetarëve, parlamentarëve, autoriteteve lokale dhe shoqërisë civile.

Grupi shqiptar që mori pjesë në Forumin Mesdhetar të ALF, Marsejë 2013

Shqipëria ishte po ashtu pjesëmarrëse në këtë ngjarje, me 4 përfaqësues nga organizata shqiptare të shoqërisë civile. Qendra Shqiptare për Studime Orientale u përfaqësua nga drejtori ekzekutiv i saj, Ermal Bega, ndërsa Forumi Shqiptar për Aleancë të Qytetërimeve, si kryetar i rrjetit të Fondacionit Anna Lindh për Shqipërinë, u përfaqësua nga Laura Xhaxhiu.