U mbajt Kuvendi i 2-të i Aleksandrisë për Edukimin

Ermal BEGA

U MBAJT KUVENDI I 2-TË I ALEKSANDRISË PËR EDUKIMIN

(16-18 dhjetor 2012)

Nga 16-18 dhjetor 2012, në Aleksandri të Egjiptit u mbajt Kuvendi i 2-të i Aleksandrisë për Edukimin (II Alexandria Education Convention), organizuar nga Fondacioni Anna Lindh (ALF), në bashkëpunim me Institutin Suedez në Aleksandri. Qendra Shqiptare për Studime Orientale (ACFOS-Albania) ishte pjesë e këtij aktiviteti, dhe përfaqësohej nga kryetari i saj, Ermal Bega.

Ermal Bega dhe Andreu Claret

Fokusi i Kuvendit të 2-të të Aleksandrisë (i pari u mbajt më 30-31 tetor 2011) ishte që të përfshijë pjesëmarrësit e përzgjedhur në një proces konsultimi për futjen e një programi në lidhje me edukimin qytetar ndërkulturor dhe paraqitjen e një burimi mësimor në këtë fushë drejtuar praktikuesve të edukimit formal dhe jo-formal.

40 përfaqësues nga rrjetet kombëtare të Fondacionit Anna Lindh (ALF), si dhe të ftuar të tjerë nga institucione të ndryshme ishin ftuar për të marrë pjesë në këtë kuvend i cili si qëllim kryesor kishte konsultimin dhe diskutimin për futjen e një programi në edukimin qytetar ndërkulturor i cili ka të bëjë me edukimin formal dhe jo-formal. Vetë programi arsimor synon që të përkrahë zhvillimin e praktikave dhe aktiviteteve arsimore për të ndihmuar të rinjtë dhe të rriturit për të pasur një rol aktiv në shoqëri. Gjithashtu, ky program arsimor do të përkrahë pjesëmarrësit për të ushtruar të drejtat dhe përgjegjësitë e tyre në shoqëri, duke kuptuar dhe vlerësuar mendimet, traditat e ndryshme, si dhe mënyrën ndryshe të jetesës së qenieve njerëzore.

Kuvendi i 2-të i Aleksandrisë për Edukimin u zhvillua përmes seancave plenare dhe 3 grupe pune duke i bërë pjesëmarrësit shumë aktivë në procesin e përgatitjes së burimeve mësimore dhe burimeve të internetit për edukimin qytetar ndërkulturor.

Këto grupe u mblodhën që të diskutonin së bashku me pjesëmarrësit e tjerë për çështje studimore në lidhje me përbërësit mësimorë nga vetë përvojat e tyre duke ndarë praktikat më të mira dhe duke diskutuar për sfidat bashkëkohore të mësimdhënies.

Në fund të kuvendit, organizatorët zhvilluan një diskutim të hapur me pjesëmarrësit në lidhje me hapat e mëtejshëm në edukimin qytetar ndërkulturor.

Në këtë aktivitet ishte ftuar për të ndarë mendimet e tij dhe ambasadori i Francës në Egjipt, z. Nicolas Galey.

Disa nga pjesëmarrësit në këtë kuvend do të marrin pjesë gjithashtu në Forumin e 2-të Anna Lindh 2013, i cili zhvillohet në Marsejë të Francës, më 4-7 prill 2013.

I përfshirë në këtë aktivitet ishte dhe një vizitë e paharrueshme në Librotekën e Aleksandrisë (Bibliotheca Alexandria), darka në një nga restorantet më të njohur të Aleksandrisë me kuzhinë tradicionale orientale, etj. Gjithashtu, disa foto të përbashkëta i bënë më emocionuese këto ditë të aktivitetit.