Simpoziumi "Hafiz Ali Korça dhe personaliteti i tij poliedrik"

Në Tiranë u mbajt simpoziumi shkencor "Hafiz Ali Korça dhe personaliteti i tij poliedrik"

MEHDIU: SHTETI SHQIPTAR DUHET TË THEMELOJË ÇMIMIN

"HAFIZ ALI KORÇA"

Liridon KADRIU - Prishtinë

Në ambientet Ministrisë së Turizmit, Kulturës, Rinisë dhe Sporteve (MTKRS) në Tiranë, për nder të 100-vjetorit të Shtetit Shqiptar, Qendra Shqiptare për Studime Orientale, me qendër në Tiranë, më 6 Tetor 2012 organizoi simpoziumin me temë: “Hafiz Ali Korça dhe personaliteti i tij poliedrik”.

Në këtë simpozium merrnin pjesë personalitete të shquara nga fusha akademike, diplomatike, përfaqësues institucionesh dhe organizatash joqeveritare, si dhe miq e familjarë të atdhetarit e fetarit të devotshëm, Hafiz Ali Korça.

Moderuar nga Qani Sulku, ky simpozium nisi me disa poezi recituar nga poligloti dhe profesori universitar Edvin Cami. Më pas u bënë përshëndetjet e rastit ku fillimisht përshëndeti drejtori për kulturë pranë KMSH-së (Komuniteti Musliman i Shqipërisë), Genti Kruja, i cili fillimisht falënderoi të pranishmit dhe më pas në pika të shkurtra rrumbullakësoi jetën dhe veprën e Hafiz Ali Korçës, si një patriot i pashoq dhe atdhetar i devotshëm.

Nga familjarët e pranishëm, fjalën e mori zonja Fatmira Pere, mbesa e hafizit, e cila foli me devotshmëri për figurën e gjyshit të saj nga i cili tha se kemi mësuar shumë. Ajo ndër të tjera citoi: “Hafizi ishte fetar, historian, poliglot, politikan, atdhetar dhe mbi të gjitha e donte vendin e tij. Ai refuzoi shumë poste në Turqi e Arabi. Ai e donte Shqipërinë dhe shqiptarët”, përfundoi zonja Pere.

Pas këtij fjalimi emocionues, fjalën e mori duke nisur ligjërimin për figurën e Hafiz Ali Korçës, Ermal Bega, Drejtori Ekzekutiv i Qendrës Shqiptare për Studime Orientale -si organizatore e këtij simpoziumi. Zotëri Bega falënderoi të pranishmit dhe posaçërisht ata që ndihmuan në organizimin e këtij simpoziumi, kur dihet që bëhet fjalë për një figurë kaq madhështore të popullit tonë. "Për figurën e Hafiz Aliut fillimisht mësova kur isha në shkollë të mesme, në kohën që bleva librin "Shtatë ëndrrat e Shqipërisë", nga i cili mësova realitetin e hidhur që parashihte Hafizi për Shqipërinë komuniste që do ta sundonte këtë vend." Më pas, kryetari i kësaj qendre, potencoi se figura e Hafiz Aliut duhet të ngrihet lart e më lartë dhe të marrë vendin që i takon, sepse vepra dhe jeta e tij janë të mëdha dhe duhen studiuar dhe të vlerësohen shumë nga institucionet tona. "Kam vizituar Korçën, Kavajën, Durrësin, Tiranën dhe qytete të tjera për të kërkuar të mbledh librat dhe dorëshkrimet e Hafizit", u shpreh ai. Gjithashu, ai tha se Hafiz Aliu është autori i parë në letërsinë shqipe i cili ka komentuar poezinë me poezi, si në rastin e librit "Shtatë ëndrrat e Shqipërisë". Ai bëri të ditur se një pjesë të librave të Hafiz Alit i ka botuar shtëpia botuese nga Maqedonia, Logos-A, libri "Mevludi" është ribotuar nga akademiku ynë i nderuar Feti Mehdiu, i cili na ka nderuar sot me praninë e tij, dhe libri "Bolshevizma á ckatërrim për njerëzimin" është ribotuar në Tiranë. Në fund, z. Bega bëri të ditur një lajm të madh të cilin ia kishte kumtuar Fatjoni, një stërnip i Hafiz Ali Korçës, se janë gjetur mbi 3000 faqe dorëshkrime në gjuhën shqipe, perse, arabe dhe osmane, të shkruara nga Hafiz Ali Korça, të cilat pritet që më vonë të ndriçohen e të botohen.

Profesor Edvin Cami u paraqit sërish para publikut me recitimin e një poezie tjetër të marrë nga libri "Shtatë ëndrrat e Shqipërisë" (Ëndrra e parë), e cila simbolizonte komunizmin nga i cili shqiptarët pësuan për 50 vite me radhë. Qysh para shumë dekadash Hafiz Aliu kishte parashikuar të këqijat e komunizmit duke e krahasuar atë me një kuçedër. Fatkeqësisht, as vetë ai nuk mundi t’i shpëtonte kësaj "kuçedre" -komunizmit shkatërrimtar nga i cili u dënua, dhe u internua në Kavajë, ku dhe vdiq në një moshë të thyer.

Akademiku i nderuar Feti Mehdiu, i cili kishte ardhur enkas nga Prishtina i ftuar për këtë simpozium, ndër të tjera përmendi se Hafiz Ali Korça bën pjesë në mesin e njerëzve më të ndritur të kombit shqiptar dhe si i tillë duhet të konsiderohet dhe të lartësohet edhe nga institucionet shtetërore, sepse puna dhe vepra e tij janë të tilla. Ai propozoi që shteti shqiptar duhet të themelojë çmimin "Hafiz Ali Korça", i cili duhet t’i ndahet personaliteve shqiptarë që ndjekin rrugën e Hafiz Ali Korçës.

Më vonë sërish para të pranishmëve u shfaq prof. Edvin Cami i cili lexoi disa rubai nga poezitë e Umer Khajjamit, të përkthyera mjeshtërisht prej Hafiz Ali Korçës, nga origjinali persisht, si një kritikë në atë kohë ndaj përkthimit të gabuar nga anglishtja të Fan Nolit.

Mbi kontributin e madh që ka dhënë Hafiz Aliu në zhvillimin e arsimit shqip, fjala iu dha nën/drejtorit të Institutit Shqiptar të Mendimit dhe Qytetërimit Islam (AIITC) në Tiranë, profesorit dhe historianit Bedri Telegrafi. Gjatë kumtesës së tij, prof. Telegrafi vuri në dukje se një meritë të madhe për alfabetin e sotëm shqip ka dhe Hafiz Ali Korça, i cili mbi 60 vite ia kushtoi zhvillimit të arsimit shqip.

Ai thoshte se: "Zoti i besimit është edhe Zoti i shkencës". Hafiz Ali Korça ishte edhe hartues i një abetareje dhe gjithnjë deklaronte se "fqinjtë kanë arritur shkallë të lartë të arsimit, kurse në Shqipëri mësohen të gjitha gjuhët, por jo dhe shqipja".

Simpoziumin e përshëndetën psikologu dhe profesori universitar Jashar Demiri, i cili falënderoi dhe përgëzoi Qendrën Shqiptare për Studime Orientale për punën e saj në fushën e studimeve orientale, ndërsa më pas komentuan dhe prof. Xhemal Balla, dhe Dr. Laurant Bicaj, i cili tregoi se sa shumë e çmonte figurën e Hafiz Aliut, poeti i madh shqiptar Naim Frashëri.

Në fund të simpoziumit, Drejtori Ekzekutiv i Qendrës Shqiptare për Studime Orientale, z. Ermal Bega, i dha një vlerësim familjarëve të Hafiz Ali Korçës për vlerat e tij të mëdha fetaro-morale, kombëtare, arsimore etj., të cilin në emër të familjes e pranoi nipi i tij Ali Korça, i cili ka trashëguar emrin e nderuar të gjyshit të tij. Gjithashtu u shpërndanë dhe dy certifikata pjesëmarrjeje për ligjëruesit në këtë simpozium, për akademikun Feti Mehdiu dhe prof. Bedri Telegrafi.

Gjithashtu u pajtua që së shpejti një simpozium i tillë të mbahet edhe në Prishtinë dhe iu bë thirrje institucioneve që figura e Hafiz Ali Korçës të ndriçohet, studiohet dhe të marrë vendin e merituar, sepse vepra dhe jeta e tij e ka dëshmuar se e meriton.

Në vitin 2006 janë ribotuar librat "Rubaijjati Umer Khajjamit" dhe "Shtatë ëndrrat e Shqipërisë", ndërsa në vitin 2008 është ribotuar libri "Jusufi me Zelihanë".

Ky shkrim është botuar në Prishtinë, në gazetën Epoka e Re, e martë 9 Tetor 2012.