U mbajt konferenca e 9-të ndërkombëtare për gjuhën arabe, Bejrut

U MBAJT KONFERENCA E 9-të NDËRKOMBËTARE PËR GJUHËN ARABE

Më 30 Prill dhe 1 Maj, 2014 (1-2 Rexheb 1435), Organizata Botërore për Gjuhën Arabe në Bejrut të Libanit organizoi konferencën e 9-të ndërkombëtare për gjuhën arabe.

Tema e sivjetme për këtë konferencë ishte: “Shkaqet e rënies dhe përpjekjet për t’u ngritur”.

Në këtë konferencë ndërkombëtare ishin ftuar studiues të gjuhës dhe letërsisë arabe nga 15 shtete të ndryshme, nga bota arabe, si dhe nga Irani, Turqia, Shqipëria, Maqedonia etj.. E veçanta e kësaj konference ishte pjesëmarrja e 3 shqiptarëve, që ishin: Dr. Abdulkerim Arnauti me origjinë shqiptare nga Bejruti, orientalisti Ermal Bega nga Tirana, drejtori ekzekutiv i Qendrës Shqiptare për Studime Orientale (ACFOS-Albania), dhe Gafurr Jusufi nga Shkupi (drejtori i shoqatës kulturore “Dituria”).

Gafurr Jusufi, Abdulkerim Arnauti, Ermal Bega

Menjëherë pas prezantimit të konferencës nga Dr. Husein Al-Atwi, u zhvillua shpërndarja e diplomave për studentët e vitit të fundit universitar 2013-2014, të diplomuar në Universitetin e Thirrjes në Bejrut.

Më pas, fjalën e mori përfaqësuesi i ministrisë libaneze të Libanit, Dr. Muhamed Al-Meshni, i cili foli për rëndësinë e kësaj veprimtarie akademike dhe shkencore në Beirut.

Fjalën pastaj e mori kryetari i Organizatës Botërore për Gjuhën Arabe, Dr. Abdulnasr Xhebri, i cili pasi falënderoi të gjithë pjesëmarrësit, foli rreth rëndësisë që ka studimi i gjuhës arabe, si dhe bëri një historik të shkurtër që nga konferenca e parë e organizuar nga kjo organizatë deri më sot, mbi gjuhën arabe.

Titulli i kumtesës së përbashkët nga Abdulkerim Arnauti dhe Ermal Bega të trajtuar këtë vit ishte: “Gjuha arabe dhe ndikimi i saj i drejtpërdrejtë në ngritjen e pasurisë shkencore ndër shqiptarët”, ndërsa tema e Gafurr Jusufit ishte “Ndikimi i gjuhës arabe tek joarabët dhe metodat e të mësuarit”.

(Momenti i ndarjes së certifikatave)

Gafurr Jusufi, Abdulkerim Arnauti, Ermal Bega

Në fund të ditës së dytë dhe të fundit të konferencës, të gjithë pjesëmarrësit morëm nga një certifikatë pjesëmarrjeje në këtë konferencë ndërkombëtare për gjuhën arabe, ndërsa më pas zhvilluam një vizitë turistike në zonën malore të quajtur Mlita, jo shumë larg qytetit të Saidas. Në mbrëmje hëngrëm një darkë të shijshme me peshk të freskët nga bregdeti i Saidas.

Pas konferencën na ishin rezervuar disa takime zyrtare me përfaqësues të shtetit të Libanit, vizitë kulturore dhe bashkëpunimi në disa universitete, si dhe me disa përfaqësues nga shoqata të ndryshme të shoqërisë civile arabe të Libanit. Vlen të përmendet takimi që zhvilluam me kryeministrin e Libanit, Tamam Bek Selam, të cilin e falënderuam për pritjen që i bëri delegacionit tonë të përbërë nga 3 shqiptarë, një arnaut nga Beiruti, një shqiptar nga Tirana dhe një nga Shkupi, në zyrën e tij si dhe i uruam suksese dhe mbarësi në ushtrimin e detyrës në krye të qeverisë së Libanit.

Kryeministri i Libanit, Tamam Bek Selam dhe Ermal Bega, 4 Maj 2014, Bejrut